繼噚日權智（601）小試牛刀又食胡後，今日經紀陳又再推介搞展覽的建發國際（223），佢話隻股睇嚟距離開車之時不遠矣。
建發呢排都算新聞多多，過年前又俾外籍財經名嘴，撰文大力抨擊兩項奇怪交易，但經紀陳話鬧還鬧，人哋嘢就照做，好似最近用價值1900萬銀，佔已擴大股本9%的新股，收購網上資料庫交易，雖然外界議論紛紛，但在股東會上無驚無險獲通過。
經紀陳話，建發股價一直按兵不動，守住1.2元樓下，其中一個原因就係要等交易完成，新股出籠先算，二來人哋印公仔紙每股作價係1.25元，喺交易未完成前就升穿呢個價，又實在好難向公眾交代，家陣既然咩都搞掂晒，重唔係到達開車之時？
重有，佢話有關人等近日亦不敢怠慢，向證券界同傳媒搞咗個倫敦遊，剛於噚日出發，響新貨出籠之時，大搞吹水活動，重唔係博炒作之象？佢話當成交增加，應該就係做嘢之時。
慕容小初