民政事務局局長何志平代表香港求得下籤，港股羊年又差少少都唔可以紅盤高收，真係大吉利是。恒指噚日收9252，跌6點。以前，若果大市只欠幾點就可以紅盤高收，點都會有華資手多多將個紅盤托高收市，真係今時唔同往日，連華資都費事理港股紅盤係高收定低收。
青島啤酒（168）繼續被鄧普頓基金減持，點知愈減持股價就升得愈勁，噚日再升11％，收報5.55元，不過成交就只得2300萬元。市傳青啤已經成功發可換股債券予安海斯-布希集資14億元，估計可於短期內進行重大收購，相信刺激股價進一步上升。呢批債券行使價介乎4.45至4.68元。在通過發行債券前，青啤股價升至4.60元水平便行人止步，但一通過發債後，股價即急升突破5元關口，擺明是有心人有意將股價托住，令到債券持有人處於一個安全水平，而且大戶回報目標應絕不止於20至30%，暫時都不會行使債券換股權沽貨。據過往經驗，鄧頓普沽貨唔等於股價一定會跌。
新世界系重組已於馬年尾完成，新基（301）跟手就向股東派發太平洋港口（659）股份，於一兩日內送到新基股東手上。噚日已有散戶偷步沽貨，搞到太港Dump一聲跌13％，成交573萬元。
麗展（488）及豐德麗（571）停牌搞私有化，尚未停牌的鱷魚恤（122），噚日就突然急升24%，唔通麗新係搞私有化搞得興起，想連鱷魚恤都私有埋？睇番鱷魚恤盤數，每股資產值達0.646元，較噚日收市價有成3.52倍溢價，確有潛質被私有化喎。
阿虎