董特首擅長耍太極，大家唔好誤會八方新年流流，又喺度「潤」吓董先生，皆因今次講嘅的確係「耍太極」。話說董特首習慣每朝清晨，都會「白鶴亮翅」、「野馬分鬃」一番，兩年幾前佢喺屋企半山嘉慧園嘅平台停車場耍，近年就轉移地點，去咗一個私人地方練功。
事緣噚日有位的士司機打電話畀商台《風波裡的茶杯》，提及佢一位乘客話董特首成日喺停車場耍太極，又要封場。特首辦發言人麥國華即刻致電澄清，話董先生已經成兩年冇喺平台停車場處耍太極喇，佢後來同八方講，問過董生嘅保安人員，佢哋話就算以前亦都冇試過要封場。八方都信董特首冇理由要求封場咁誇張，可能位的士大佬聽錯，不過，到底佢𠵱家喺邊度耍呢？麥國華就點都唔肯講，認真神秘。
傳真︰2623-9278
電郵︰