蘇永康缺席大年初一在拉斯維加斯的登台表演，雖然他所屬的金牌經理人公司表示康仔是因趕不及簽證所致，但箇中原因眾說紛云。
康仔現正身處星洲避年，昨日他接受本報長途電話訪問時便說：「我一月十號先去過大西洋城登台，但每一次演出，都要由唔同嘅人幫我申請工作證，雖然隔三個禮拜，我返嚟香港之後再為初一場騷申請過，我攞BNO嘅，填嘅表亦都係一樣，後來公司嘅人同我講，話時間上唔許可，做唔切個證，但冇話唔批喎，我知道嘅時候大概係年廿八，而程序中出現乜嘢問題，我唔清楚，但我都要向嗰邊嘅主辦商講聲唔好意思。」
對於有報道指他服食搖頭丸事件，而被美國政府拒絕他入境，康仔說：「對呢啲渲染嘅報道，我得三個字，犯太歲，我屬羊，今年犯太歲，初三嗰日我喺呢便已經攝咗太歲，我又冇案底，又唔係賣（搖頭丸），點解對我有咁嘅睇法，三個星期前就去到美國，唔通我偷渡呀？我只係預計唔到去年八月發生嘅事，會提升到國際層面啫。」
此外，為康仔接下今次登台的「演唱會之父」陳達志（BA叔），昨日在電話中表示自己正身處美國，為康仔甩底一事而向主辦商致歉，BA叔說：「康仔喺一月中先去過美國，隔咗十幾日之嘛，點會嗰次去到，呢次去唔到？佢冇問題㗎，係我擺烏龍，搞到時間太趕，搞唔到簽證，佢邊度登台都去到，六月都會同陳慧嫻去西安做騷。」
採訪：朱芷瑩