報紙上出現咗好多權威人士，譬如一月二十九日嘅《明報》A6版有一條標題好嚇人，小題係：「政府權威人士警告 影響遠比加稅大」，大題係：「財案不滅赤 聯匯恐即晚遇襲」，至於內容咯喎，自然係為咗加稅、減公僕薪酬做足準備工夫，再睇埋同日《文匯報》，斟酌新聞內容，我哋好容易估到呢位權威人士就係梁錦松。「聯滙」是否即晚遇襲（三月五日晚），大家都唔知，不過如此講法，甚有哄動性，公僕唔肯減薪，就係「香港罪人」嘞，反對加稅嘅，亦要承擔遇襲後果！
問大編輯：「各報都有權威人士，究竟係邊個打邊個？」大編輯話：「根據我啲路邊社非權威人士消息，你可以如此靠估，估唔中唔好賴我，亦唔好鬧。憑消息及經驗判斷，《經濟日報》嘅權威人士可能係馬時亨；《明報》講嘅權威人士可能係梁錦松或任志剛；《星島日報》嘅權威人士可能來自特首辦；至於《文匯》、《大公》咯喎，可以直達天庭，權威人士可能就係最高當局。權威人士當然可以隨時變身，靈活交叉走位嘅，某時某日喺邊一張報紙出現，要靠你個鼻去索咯。」
有權威人士垂注，新聞又係幾易做，勝於大編輯派啲記者周圍撲，搵線索，冇貨交就俾上頭喝。不過要有權威人士睇，唔係咁易㗎，唔friend邊個肯睬你呀，好似《壹》仔咁，斷晒六親，大人物聽見話《壹》仔記者電話，立即唔講嘢，隨即話開會，邊度肯俾你埋身呀。