噚日年初四，金市同股市齊齊開市，八方有去湊熱鬧，睇吓一年一度嘅新春開市儀式之餘，亦想知道新正頭有冇財運。喺上環嘅金銀業貿易場，請到財經事務及庫務局局長馬時亨親臨主禮。佢更入鄉隨俗，着住貿易場出市代表嘅紅色外套，周圍同人拜年。
肥仔馬見到八方，即刻騷出條新呔畀八方睇，原來上面有啲羊仔同金幣圖案，非常應節，佢重話特登買嚟配合羊年開市，不過啲圖案就細粒咗啲，讀者睇相可能要落足眼力。
有「神婆」同八方講，羊年唔係旺羊，而係旺馬，所以適宜擺隻馬或者打條馬呔，或者擺佢自己喺度已經夠照。至於肥仔馬自己屬龍，同狗最唔夾，除咗牛羊今年不宜外，更千祈唔好揀狗呔。
﹙圖﹚馬時亨打條羊仔呔襯出市紅色外套，應節又醒神，不過「神婆」就話同今年唔係好夾。程志遠攝
傳真︰2623-9278
電郵︰