羊年第1個交易日，小初謹祝大家新年發大財。
由於呢期流行工業股，連帶好多隻上市多年的冷門工業股都重新獲得垂青，經紀陳聽聞，話權智（601）亦有機會成為其中一隻。權智近月來頻頻回購，而且股價亦愈買愈高，過年前最後兩個交易日直頭一支箭咁抽上去，上周四收0.255元，升15.38％。
經紀陳話，查實權智舊年11月左右，公布截至9月底中期業績由虧轉盈，賺1936萬銀，當時有關人等已經躍躍欲試。小初翻查呢隻股嘅往績，發覺佢每隔一兩年就會炒一轉，只係次次都唔同搞手，今次又唔知搵乜人而已。
至於炒作藉口，權智亦唔係無。一來佢生產嘅電子字典響大陸聽聞做得唔錯，就算係個人數碼助理，在大陸市場競爭咁大的環境下，據聞亦都搵到生存空間。照計呢期基金對工業股渴求，權智獲得外資基金垂青，都咪話冇機會。
慕容小初