噚日初三赤口，拜年拜到攰嘅話可以趁機唞唞，八方同立法會議員蔡素玉同李華明傾開，先知佢哋各有節目。蔡素玉最識歎，約埋成班朋友去北角一間佛堂食齋、吟詩作對，重請埋書法家即席揮毫，蔡素玉得到嘅四字真言係「厚德載物」。
又食又拎，蔡素玉梗係開心，原來初一同噚日都係食齋嘅蔡素玉，唔係單單為咗減肥，因為佢同時係虔誠佛教徒，咁食齋都可謂一舉兩得，不過講到派利是，蔡素玉就話唔會用十蚊封，至少都係二十、五十蚊。
至於另一邊廂民主黨嘅李華明都好豪氣，聯同成班民主黨九龍東支部黨友，帶埋財神同一萬封朱古力利是，周圍向街坊拜年。蔡素玉食齋，肥仔明當然比唔上佢咁健康，呢幾日難免大飲大食，初一中午更依足上海傳統，品嘗阿媽親手煮嘅龍眼紅棗蓮子糖水，減唔到肥，有食神都唔錯。
傳真︰2623-9278
電郵︰