新年留港的確幾悶，節日氣氛又唔夠，好多舖頭食肆又唔開，一班朋友就提議去深圳玩番日，感受濃厚的新年氣氛。呢班豬朋知我奄尖，事前已經做好資料搜集，話錦繡中華特別為新春炮製了一系列的精采節目。我睇勻咁多節目，以千萬製作的大型舞台劇、迎春燈會和明刀明槍的馬戰表演最有睇頭！
記者：歐嘉荃
攝影：Manny
鳴謝：香港深圳灣假期旅遊公司
日與夜的錦繡中華同樣精采，而我較喜愛晚上的氣氛，場內布滿各式各樣的大型花燈，更擠滿了人，氣氛較香港濃厚。雖然花燈吸引，但我最欣賞還是那個耗資千萬的《龍鳳舞中華》大型歌舞劇，以中國的歷史和民俗風情為主，載歌載舞的表演，配合中國的雜技，以及煙花、雷射激光等的視覺享受，的確叫我難忘。
中國的歌舞劇少不免混入傳統的雜耍，除了軟骨功、壁虎功外，最難忘便是這幕頂頭功，這名身穿貼身舞衣的舞蹈員，頭倒立地轉動，重要轉足起碼3分鐘咁耐，簡直好似《少林足球》中大師兄的鐵頭功咁勁。轉完咁多個圈，佢重可以繼續跳舞，呢款雜耍絕技的確令我看到目瞪口呆，只識得「嘩！嘩！嘩！」。
對於好少睇大型歌舞劇的我，覺得好多場都畀到我驚喜的感覺，好似有幕講中國的節日，就有工作人員推出一條銀龍，當我正在細心欣賞龍姿之時，銀龍突然發放煙花，出奇不意地又增加了場面的可觀性，場內的小朋友大叫、大朋友勁拍手，可見場面幾咁震撼。
阿旺最鍾意踩高蹺玩洞房，但高蹺技術真係得個笑字，講到技巧高超，呢位女舞蹈員就真係冇得頂，腳踏高蹺重要不停跳舞，難度有幾高唔使我講，總之你同我都做唔到，其中重有個舞蹈員踩住高蹺玩空翻，呢一幕絕對唔好錯過。
《龍鳳舞中華》
時間：7:45pm-8:40pm
地點：鳳凰廣場
歌舞劇夠晒熱力沸騰，但講到有春節氣氛，一定要去戶外的賞燈會，雖然日間也可欣賞到這幾十個大型燈飾，不過夜晚睇就另有一番風味，還有猜燈謎、賞歌舞等表演，可以話係深圳最大規模的迎春賞燈晚會。
有鳳當然要有龍，呢條有成50米長的巨龍，全條龍的鱗用了2萬幾隻VCD做成，踏雲飛揚的龍鳳，配合燈光的照射，威武又具霸氣。
四川自貢是燈展之鄉，花燈手藝當然極之到家，而且夠晒創新。鳳凰是中國喜慶、高貴的象徵，所以場內最突出的花燈便是這隻正向天飛翔的鳳凰，遠睇的確幾壯觀，鳳凰的姿勢極度美妙。我就建議各位行埋幾步睇睇，你會發覺原來全隻鳳凰都由瓷碟、碗、匙羹組合而成，創意同手工絕對令我歎為觀止。
迎春賞燈會
地點：大觀樓、傣寨廣場、翠湖
時間：6:30pm-10:00pm
我最鍾意刺激，聽到一有馬戰我就即刻飛奔去睇，聽朋友話呢個馬戰是講述成吉思汗統一中原的英雄故事，雖然我由細到大都討厭歷史，不過馬戰的場面就的確幾澎湃，絕對唔可以錯過。
馬戰是最兇悍、最驚心動魄，坐在馬背上的演員真刀真槍係咁打，驚險萬分，我睇到連大氣都唔夠膽唞。
一代天驕
地點：海邊廣場
時間：3:00pm-4:00pm；7:00pm-8:00pm
錦繡中華
電話：(86)75526606526
地址：深圳華僑城
門票：成人?120、1.1至1.4米高小童?60（1.1米以下小童免費）；2月4日至2月15日晚上6:30後入場?50。
開放時間：9:00am-10:00pm
交通：可乘26、204、209、222、223、101、105、301、310、370大巴及423、429、434、439小巴。由羅湖火車站乘的士約?60。