羊年來臨，恭喜發財，事事如意。上周四港股埋馬年年結之後，美股先急跌然後反彈。今日羊年啟市，紅盤如何，昨晚美股點走會有啲左右作用，美股如無大好大壞，港股估計反覆，短期內唔易有大突破。
恒指窩輪對恒指變化直接有反應，無論係Call或者Put暫時都唔適宜見高追買見低追沽，只宜當恒指升一二百點之時，趁低買入Put輪，對象係9556同9587，而當恒指跌一二百點之時，則趁低買入Call輪，對象係9553同9663。呢啲恒指輪槓桿率唔細，分分鐘好短時間之內輪價變化一兩成甚至更多，落場買賣注碼咪太大。
中移動（941）由月中高位20.20元跌到𠵱家18.40元，走勢疲弱，如果再跌多啲，則有超賣情況，到時趁低執啲Call輪博反彈，對象有9563，隻輪4月到期，現價12仙，溢價7.1%，槓桿率15.3倍。想搵啲壽命比較長嘅對象，則揀9650，7月到期，現價9.6仙，溢價16.6%，槓桿率19.2倍；槓桿率唔低，壽命又長啲，自然要畀高啲溢價。
中移動兩隻前熱門Call輪9526同9532，下月初夠鐘，溢價逾11%，時日無多，最後都冇法子唔作廢，咪貪平。
章盛