本欄引述專家講新年流年運程，好多人鍾意睇；其實左丁山對呢啲事係半桶水，完全唔係專家，但覺得幾有趣味性，講吓無妨。但一位讀者劉東電郵道：「不明白以你的學歷見識，為何常在專欄談論玄學，我師尊李天命早便把命理術數作出很大的批判，不要跟我說信則有不信則無，這句話更是似是而非。」
李天命既係讀者劉師尊，讀者劉大概好精於思考邏輯！李天命狠批玄學，有佢嘅理論根據，亦有佢嘅科學態度，但別人相信玄學，研究玄學，你唔話得佢笨、佢迷信。譬如讀者劉嘅師叔岑逸飛（喺新亞書院畢業年份比李天命低兩班），與李天命同出唐君毅、牟宗三一門，對易經卜卦之學，非常精通，心血來潮，意到之時，就占卜一番。譬如佢九二年左右為香港前途卜卦，每年一卦，去到二○○○年，文化界人士知之甚詳，眨吓眼過咗十年，左丁山翻查舊紀錄，岑逸飛雖然唔啱得晒，但有啲事情，宏觀大方向，又幾準噃！十幾年前左丁山碰到一位仁兄，業餘研究八字算命，左丁山好奇之下，請佢為左丁山算一算，份命書重keep住，久唔久就望吓、印證吓。嚡，本人之大前程俾佢測中晒！呢位仁兄果然功力深厚，有咁啱得咁蹺，佢係讀者劉嘅大師伯，同樣受教於唐君毅。所以咯喎，仍然係嗰句，玄學之說，信不信由你，無謂辯論。