我羅拉細個嗰陣，成日都喺電視睇到啲外國劇集，當中最鍾意睇嘅包括《蜘蛛俠》同《變形俠醫》。
《蜘蛛俠》早排拍成電影，都不知幾收得，相信今年六月上映嘅電影版《變形俠醫》亦唔會輸蝕得去邊。
由李安做導演嘅《變形俠醫》，搵咗型男艾力班拿（EricBana）飾演主角班納醫生，重有金像女星珍妮花康納莉（JenniferConnelly）拍住佢，唔少影評人一早將呢部戲視為今年至期待電影之一。
喺美式足球超級碗決賽當日，《變形俠醫》同《22世紀》續集一齊賣廣告，前幾日我就介紹過《22世紀》，而《變形俠醫》嘅預告片亦唔失禮。其實之前已有片段披露過主角發狂之後變成點，今次重見到十五呎高、過千磅重嘅綠色巨人周圍搞破壞，卒之要出動軍隊同坦克車，但係架坦克遇着巨人，都要俾佢當鏈球咁掟到鬼咁遠。
雖然以前扮變形俠醫個大隻佬，都話𠵱家由電腦動畫特技做出嚟嘅巨人似足漫畫，但係我羅拉始終覺得當年劇集嗰個綠色筋肉人順眼啲！