年年都會有人替立法會議員埋單計數，好似學生哥嘅成績表咁，統計吓邊個曾經提出最多私人議案或者質詢，邊個出席、缺席率最高。永遠不在監察名單上嘅立會主席范徐麗泰，表現又點呢？有議員私下向八方力證，范太可能係立會內最勤力聽書嘅一個。
原來開會發言，議員一般都想霸頭位，怕講到最尾人人瞓晒覺，就算舌燦蓮花講到曉飛都冇人欣賞。有次某位想質詢官員施政嘅議員排包尾發言，非常冇癮，點知開口講咗兩句，范太即刻截停佢，原來范太耳尖到聽得出佢嘅口頭發言，有幾個字眼同佢之前提交嘅書面問題有出入，要求更正。
呢位議員不但冇嬲范太，反而好感激佢咁認真對待自己嘅發言。睇嚟班議員都要向范太請教力抗睡魔嘅秘訣，免得喺下年特首嘅施政報告，做翻版黃宜弘。
﹙圖﹚身為立法會主席嘅范徐麗泰，開會開到最尾都依然咁留心。
傳真︰2623-9278
電郵︰