「紅魔」曼聯同「兵工廠」阿仙奴今個月十五號喺足總盃決生死，據聞兩隊唔肯放人踢十二號嘅國際賽。BBC引述小道消息話，英格蘭教頭艾歷臣反應好大，話明如果兩隊真係咁做，佢就威脅辭職。咁大件事？
又唔怪得艾歷臣火滾，因為歐洲國家盃外圍賽喺三月就重燃戰火，再唔齊人練吓波真係唔掂。如果隊波戰績差就係艾歷臣孭鑊，佢唔火滾至奇。
講開又講，上個禮拜車路士反勝列斯場波，艾歷臣錯過林柏特完場前嘅精采演出，話口未完，阿仙奴對利物浦場波，「瑞典佬」又睇唔到希斯基完場前頂入球波；好嘞，前晚維拉大勝布力般場波，佢又睇漏巴利「埋齋」球波，真係搞鬼。
利物浦前晚作客對韋斯咸大發神威，賽後領隊侯利亞就安慰對方領隊羅達，佢話：「我好同情佢，不過佢哋隊波輸畀強大嘅利物浦，無話可說。」留意吓佢嗰句「強大嘅利物浦」，擺明係乘機讚吓自己隊波多過真係同情人。不過利物浦都沉咗咁耐囉，難得隊波數人三球，侯利亞自大吓都係人之常情嘅。
我求驗客噚日至寫完雲拿保斯無心機教波，時隔一日即刻聽到佢埋怨會長列斯度爾喺賣走活基治事件上完全唔理佢，當正佢係局外人喎。雖然呢位老人家話暫時會繼續領軍，但話無怨氣就勢係假。另外，列斯名宿基斯亦都炮轟列斯度爾無從球迷立場出發。民怨甚深，列斯度爾繼續收到死亡恐嚇，希望唔會有唔愉快事件發生啦。
布力般前鋒約基早兩日提番俾曼聯棄用一事，重申自己好唔想走，只係領隊費格遜迫走佢喎。約基話佢踢波咁多年生活模式一直無變，曼聯簽佢嘅時候都係咁，所以覺得費爵爺話佢生活唔檢點唔成立。佢重話離隊前喺隊內體能測驗成日排第一，狀態只得碧咸拍得住佢。都咁耐咯，約基畀心機踢好波重好啦。
姚明年初二帶領火箭羊年首仗就響頭炮砌低勁旅帝王。呢場波初盤帝王讓三分，但臨到賣飛火箭倒讓兩分；不過新年流流，中國人一定捧番自己友，最後火箭贏波贏盤，有跟本報推介買火箭嘅肯定發新年財啦。另外，火箭下季將有新隊衣，主場更以紅白為主色，中國人咁講意頭，紅彤彤喺中國一定好搶手。