大年初四，立春，今日正式由馬年轉入羊年。趙飛雲謹此恭祝讀者羊年發大財，個個醒目，唔使做羊生羊太。
農曆年期間，外圍有市。歐洲股市超賣反彈，升幅可觀，美股則見反覆爭持。上周四，杜指大跌165點，翌日卻回升108點，收復8千點關口，報8053，但兩日合計仍唔見57點。
美股昨晚點走，執筆時尚未知道。不過從圖表上睇，杜指跌穿頭肩頂頸線後，落到7800水平暫見支持，9日及14日RSI均見背馳，短線頗有機會繼續反彈，但10日線和頭肩頂頸線均在8200水平，阻力甚大，估計不易破關而上。
以經濟基本因素而言，其實唔係冇好消息。例如美國企業第4季業績唔算差，最新公布嘅芝加哥採購經理指數同個人收入，均較預期理想，只係戰爭陰影籠罩下，股市要真正重踏升途，着實唔易。
美國國務卿鮑威爾將於明日到聯合國，向安理會提交伊拉克擁有大殺傷力武器嘅新證據，股市可能趁機再次尋底。港股今日頗有機會紅盤高收，但趙飛雲一於按原定策略，若見恒指升上9400水平，就買恒指Put輪9587；見滙豐（005）升近84元，就買滙豐Put輪9588。
大市雖弱，但個別股票仍有得玩。早幾日提過嘅意科（943），趙飛雲未上車佢已開車，假前收兩毫，老友話重有得去。佢順便叫老趙留意埋隻玩具股僑雄（381），話逢低吸納。當然，呢類三四線股只宜細細注。
趙飛雲