沙田賀歲馬噚日跑十場，馬會大派利是──開八場熱門，普羅馬迷多少都有啲錢收。八方現場所見，馬迷都幾開心，連幫香港求咗支下籤嘅何志平局長行出跑道頒洋紫荊短途錦標時，都竟然冇人噓；而李鳳英同陳國強兩位工會領導第五場頒賀年盃，更有馬迷鼓掌。
八方早前寫過，馬會主席夏佳理請咗三位工會領袖做嘉賓，點解唔見陳婉嫻呢？八方於是捉住李鳳英問，佢笑住話「你自己問嫻姐啦！」咁大個馬場點搵人呢，惟有散場後再打電話畀佢。
嫻姐喺電話入面笑住話，佢同阿夏叔講好咗，大家分工合作，佢負責敲銅鑼同埋點睛，頒獎就由兩位同事搞。咁有冇贏錢？嫻姐話自己冇落注，不過夏叔就非常識做，每場都買啲十蚊飛畀大家抽，贏咗攞個彩，輸咗就做善事。以夏叔嘅貼馬能力，就算亂咁買都有錢收啦，結果嫻姐第四場都抽中一隻Win。
嫻姐又話自己平時好少入馬場，佢話最希望馬會個慈善基金做多啲善事喎。
﹙圖﹚陳婉嫻（右二）有馬會主席夏佳理（右三）同行政總裁黃至剛（右）傍實，想唔贏錢都難啦！
傳真︰2623-9278
電郵︰