港聯班球員對初一臨尾輸畀烏拉圭耿耿於懷，代隊長狄恩就猛話，如果上半場佩迪里個波唔喺畀球證判「詐胡」，戰果可能完全唔同，既然冇得爭冠軍，佢都希望攞番個季軍作為安慰獎，所以今晚對丹麥嘅戰意肯定加零一。
噚日天氣轉冷，日頭都係得十四、五度，重有陣陣冷風，喺旺角場操練嘅烏拉圭就睇嚟唔多適應，穿上連帽衞衣不特止，重用帽將頭同頸包到實，雙手就插落袋（圖），好似烏龜縮埋咁款。
伊朗練習時間原本緊接烏拉圭，但佢哋就早咗半個鐘到球場，烏拉圭助教眼見伊軍大隊步入球場，就立即通知教練費連，費連就拿拿臨收操；表面睇，好似費連好有禮貌讓個場畀對手，但似乎佢係唔想洩露軍情至啱，話晒雙方今日就喺大球場爭冠軍，俾人摸清底細重得掂？