過年前銅鑼灣巧遇「中港森」，原來正準備去波斯富街地庫排隊買Kaws最新嘅「兔女郎」搪膠，佢話嗰度有簽名版，如果以正價買到，正係搵食好時機。
講起近況，原來連佢都有興趣搬去銅鑼灣搵食，事關旺角賣日本原宿水貨已鬥到割喉邊緣，始終銅鑼灣啲舖頭冇咁爛做。
「中港森」話𠵱家過銅鑼灣定要揀上樓舖，唔只貪租平地方大，最重要上樓舖可慳番唔少管理費，因為揀得做上樓舖都係唐樓，管理費貴極有限。早排「中港森」睇過怡東附近有個新改建商場，舖仔細細幾十呎，管理費竟要八千幾蚊，拍得住普通舖一個月租金。
「中港森」：「𠵱家生意已經難做，夠交租已經唔錯，最慘連管理費唔夠交，八千幾蚊都唔知要賣幾多對波鞋賣幾多件Tee先至夠皮？重有，唔知點解，𠵱家啲商用上網服務零舍貴，係普通家居上網服務成倍價錢，總之𠵱家好多公用服務針對小商戶，所以創業前真係要三思。」
以前「中港森」走水貨十分懶散，但𠵱家變得十分拼搏，相信同生意難做有關。
主持人：大食Jack
八卦熱報：