上海香港麵家只係一間裝修普通的餐館，近日卻和史力加同被HP惠普揀中成為廣告主角，廣告內容大約講香港人24小時無休的精神。24小時？香港多的是呀，為何只選這間呢？24小時，原來是一個身份象徵，要像上海香港麵家從開店至今，依然保持全年365日常旺的紀錄，在現今這個市道，可算是奇迹之店！
記者：邵超 攝影：陳智良
上海香港麵家的老闆顧先生真係好忙，約訪問也打了整天電話才聯絡到他本人。不過置身店裏，終於明白他係忙得有理。等待顧先生的半小時內，平均三分鐘就有人想同我搭枱，好彩返枱快，終於見到來匆匆的顧先生，他劈頭第一句話他只可以畀我一分鐘的時間，嗰一刻真係晴天霹靂！好彩事實係佢罕有地坐足一個鐘畀我做訪問，多謝畀面。
上海人不在家吃泡飯當早餐，跑到街外去，就必吃粢飯喝鹹豆漿或甜豆漿，黏稠軟的粢飯跟鹹甜豆漿是最佳拍檔。
早看過不少網評說這裏的生煎包好吃得很，那種肉的鮮甜，我都打包咗幾個返公司。
擔擔麵不是湯麵那種，香得很，食落去啖啖醬，好正！
遞上《USAToday》的報紙畀顧先生，他好開心咁話畀我聽呢個廣告在美國都有出現。
「我細佬喺曼克頓返工，喺巴士燈箱見到呢個廣告，即刻打長途畀我，重答應會用數碼相機影低寄畀我留念。我覺得可以為港增光，真係好光榮。」
呢份喜悅唔係顧先生專享，當我拿出報紙時，所有員工都好奇地圍攏，大家都覺得店子登在外國報紙上好不威風。顧先生說有兩個熱心的熟客，特別在《時代》雜誌剪下內頁的廣告給他留念，他會好好保存下來。
提起上海香港麵家的威水史，不能不提這裏的粢飯，顧先生話年中唔少上海鄉里買嚟當手信。粢飯當手信都真係第一次聽，重係有人手攞返德國，通知「附近」比利時、荷蘭等地的同鄉去德國攞手信堪稱經典。
「𠵱家每日下晝六點半，都有四架Benz過嚟買粢飯，風雨不改。」
顧先生唔係自吹自擂，店裏全日共有三個員工負責捲粢飯，現場所見，她們手不停地捲呀捲，十秒極速就捲起一條粢飯，日賣千幾條粢飯是等閒事。
講粢飯講到興起，隔籬枱有人搭訕，自稱係過二十年食客但唔願上鏡的×女士，因為好食呢個咁簡單的原因，由舊舖位食到過嚟，真係好長情。就係因為有一班好似×女士咁長情的熟客，當初做維修汽車的顧先生才不得不接手老父的店子，亦由只做半日生意做到二十四小時通宵營業。
「舖頭成功原因？我請人無乜特別要求，但廚房師傅一定要係上海人，控制到出品品質，用料要新鮮，最緊要係原汁原味，出邊有啲舖頭用骨湯粉，我哋仍然煲老火湯。」
店子二十四小時營業，顧先生可說是無覺好瞓，凌晨三、四時離店，五、六時上床已算早睡，下午二時睜開眼，又要準備一天的工作。其他員工分數更工作十個半小時至十一小時，可是在店裏你只會看到人人精神奕奕。
「辛苦？咁多年都習慣咗，初初係辛苦啲，但係咁多熟客無得唔做。睇住以前嘅細路，大個咗帶埋外國朋友返嚟，真係好開心㗎！」
顧先生今年才48歲，要退休，還早得很呢！
上海香港麵家
地址：銅鑼灣渣甸街33號地下
電話：25760782