民政事務局局長何志平噚日去車公廟祈福，破天荒幫香港求咗支下籤，八方真係冇眼睇佢，惟有睇睇佢後面。而噚日成日企喺何局長後面嘅，係佢位靚靚太座胡慧中。
成世人第一次去車公廟嘅何太一如以往，表現得好低調，就算見到老公抽到下籤，都冇話大驚小怪，個老公一路對住鏡頭解話，佢就微笑住係咁點頭，唔講嘢都交足戲。
當年一齣電影《歡顏》，作為女主角嘅胡慧中，令好多觀眾瘋狂，亦令佢成為亞洲巨星，後來佢成功轉型，成為一代打女；今時今日又嚟個大轉變，打女變貴婦，除咗氣質富泰咗之外，連身形都好貴氣！
好彩，何太身手仍然敏捷。噚日人多，佢企吓企吓俾人迫走咗，為咗追番上老公，佢突然大步走前，雙手輕推，就咁喺幾個身形高大嘅攝影記者之間走過，話咁快走番去老公隔籬，連氣都冇喘過，繼續低頭企喺老公後面。
日頭跟完，胡慧中夜晚又跟何志平去紅磡海逸睇煙花，大家猛問佢個女都兩歲，會唔會追多個，佢依然一貫小女人咁話：「呢啲嘢，唔係我話事，睇局長想唔想。」反而對於老公因為做咗局長就少咗好多搵真銀機會，佢就最介意：「我都話佢戇居囉！」
﹙圖﹚何志平去車公廟祈福求籤，胡慧中一直企喺佢身後。
傳真︰2623-9278
電郵︰