雖然堂本剛係KinKiKids嘅成員，但係佢同一般Johnny's藝人好唔同，阿剛除咗形象夠出位同刻意擺脫脂粉味之外，佢個人都幾有創作同搞笑才華㗎，好似早排阿剛就為自己即興作嘅歌曲《桃》拍咗個MV，真係笑爆我大口羅拉個嘴！
戴咗個假髮扮「薯仔」嘅阿剛，喺MV入面扮小男人，而飾演佢「老婆仔」嘅竟然係一個男演員，當阿剛喺首歌度唱到「好鍾意食桃，因為啲桃好似patpat」嗰陣，佢「老婆仔」突然揭起條裙，騷出自己變咗個桃嘅假patpat出嚟，即時嚇到阿剛面容扭曲，佢重發咗癲，扮成李小龍施展雷霆飛腿踢老婆個籮柚，踢到佢彈開幾丈遠，連個籮柚都留低腳印，大有周星馳式嘅誇張搞笑效果。
我羅拉相信有好多本地fans都想睇吓咁爆笑嘅MV，不過呢個MV原來只係會收錄喺阿剛嘅個唱VCD《LiveRossoAzzurro》入面㗎咋！