繼日本本田車廠，宣布會於廣州本田車廠嘅生產線上，製造新一代Accord車系以應付中國市場需求後，萬事得亦於日前舉行首部國產Mazda6嘅登場儀式，而且快者重可望於今年春季，於國內市場正式推出㖭！
以供應中國市場為主嘅萬事得Mazda6，將會由位於吉林省長春市嘅一汽轎車股份有限公司製造，登場儀式舉行當日出席嘅主禮嘉賓，除有中國廠方嘅代表外，日本方面亦有派員出席；而中國廠方代表張磊先生更在儀式上表示，Mazda6係一部出色嘅車款，無論外形及性能表現都予人有頗高評價，而雙方亦會響生產技術上作出改進，以求令產品質素得以提高，另外廠方亦預計新車於四月推出後，每年可售出15,000部。