車婉婉今年因為犯太歲，日前她約同其師傅麥玲玲及好友苑瓊丹，往紅磡買三合牌手鏈，麥玲玲更即場為其手鏈開光。問到何為三合牌時，堪輿家麥玲玲解釋說：「三合牌係化煞飾物嘅一種，集齊三種生肖嘅牌有合而忘沖作用，力量自然大好多。以婉婉為例，佢就宜配牛、蛇、雞嘅三合牌手鏈。」
麥玲玲又贈言車婉婉縱然犯太歲，但運程並不太差，事業更會有新突破，不過要小心說話，而姻緣方面更會隨時遇到真命天子。
問到婉婉有甚麼新年願望？她說：「新年進步。以前我唔理犯太歲要做啲乜嘢，但跟咗師傅學睇八字後，了解到沖咗之後令人生命格有變化，至於師傅話我事業有突破，令我有正極能量加倍努力，我個人一向少說話多做事，口舌上對我冇乜影響。」
麥玲玲曾說婉婉會遇到真命天子，早前婉婉被指與金融才子李兆文拍拖，對方會否正是其真命天子？婉婉說：「如果姻緣真係到，到時大家早啲到，感情嘅事我從來唔講，亦唔會喺傳媒前承認或否認有冇感情，總之我唔心急，慢慢搵。」
採訪、攝影：馮美茵