羊年第一次賽馬今日喺沙田馬場舉行。八方日前在快活谷撞到馬會主席夏佳理，馬上捉住佢同大家拜年，佢話祝各位馬迷羊年行大運，最緊要「橫財就手」，唔止買馬，打麻雀都食多幾鋪；佢又舉起「龍馬精神」揮春影相，不過有啲怕醜，擺甫士時，不斷叫行過嘅同事唔好笑佢。
八方追問夏主席，佢今日首次出賽嘅新馬「駿河」，跑第五場賀年盃，有冇貼士畀馬迷？佢竟然話連同場有乜馬一齊跑都唔知，亦唔會投注落自己馬身上，因為贏咗實有獎金喎。夏主席又話好有信心大家八月就有得合法賭波，經濟方面就希望政府唔好加太多稅。
經濟唔好，馬會都要諗多啲橋吸引馬迷入場，今日入沙田馬場，就有「喜氣『羊羊』」幸運掛飾送，重有機會抽到城市迷你汽車同羊年紀念金卡㖭！八方祝大家又中馬又中獎啦！
傳真︰2623-9278
電郵︰