新年前碰到L教授，交換名片，因為與佢相識之時，佢嘅名片銜頭係講師，現在改為「教授」，威晒。L教授話：「大家咁熟，唔怕話你知，呢啲係『銜頭膨脹』啫，換湯不換藥，薪水其實相差不遠。」
以前香港沿用英國制，每學系只有一位講座教授，下面有Reader、高級講師、講師；好多叻人做極都唔可以升上講座教授級，甚為心淡。美國就識得安慰學者心靈，分正教授、副教授、助理教授三級，叻仔升得好快，如哈佛大學校長森瑪斯二十四五歲攞博士學位，喺哈佛做助理教授，二十九歲就升做正教授，呢啲事喺英國一定唔會發生。
𠵱家香港適應潮流，大學教職改用美國式，等大家happy，只有香港大學執着於英式傳統，講師改稱教授，唔係咁易。L教授話：「上到大陸做學術交流，銜頭好重要。我有一次上去開會，派舊卡片（講師），啲人望吓就走。好彩我醒目，第二日即刻派新卡片（教授），內地學者就肯同我傾偈嘞，後來自動講清楚我係『博指』（博士生指導教授），佢哋視我為上賓㖭。港大啲同行喺大陸派講師卡片，好難建立網絡關係㗎。」
內地以前號稱無產階級專政，其實最講階級鬥爭，冇番一兩個銜頭，寸步難行。以前左丁山常返內地，特製一張內地專用卡片，羅列十幾個銜頭職位，幾有用㗎。