奧迪TT自推出以來，一直憑着本身極富流線型嘅造型，以及出色性能表現，而備受車迷追捧；正因如此，市面上亦出現有不少改裝版TTCoupe。而今日為大家介紹嘅呢部改裝奧迪TTCoupe1.8T，車主除為其加裝有全車包圍，令造型變得更富跑味外，性能表現亦有所提升㖭！有興趣嘅朋友，不妨留意一下今日嘅介紹喇！
記者：黃凱穎 攝影：陳偉林
車輛提供：TWAutosport（21420001）
逢星期一至日刊出
歐洲車改裝專家Tony認為，呢套ABT跑車包圍雖然話係奧迪TTCoupe專用，但響安裝時卻出現不少困難，例如車頭整流器安裝好後竟不能對位，要以人手固定一整天才有完美嘅效果；另外，安裝尾翼之後亦需要將尾冚重新噴油，先至能夠有絕對平滑嘅手工。最重要一環就係TT賽車版專用嘅車底擾流器，安裝時需要響車底下一番工夫才可，難怪Tony會話呢部改裝TTCoupe，絕對係佢眾多嘅改裝TT中，印象最深刻嘅一部啦！
除外觀有改動外，車主更為呢部TTCoupe改裝上TWAuto嘅電腦晶片，配合上BMC跑車風隔，從而令動力輸出數值有提升，就連起步加速時亦能有敏捷暢順嘅反應呢！與此同時，此車更改用上Brembo四活塞卡鉗制動器，就算響高速行車時需要作緊急煞車，都能夠有頗高嘅制動能力，絕對畀到你有收放自如嘅效果㗎！
雖然外觀及機械配搭上有所改動，但車主卻選擇保留原來嘅車廂布局，沒有作出太大改動，一切配搭如承托力極高嘅高級真皮座椅、原廠冷氣及音響組合等全都被保留下來，而三幅式真皮跑車軚環，亦能夠畀到你有頗高嘅把持感呢！
奧迪TTCoupe造型本已極為流線型，望落好有跑味，但響大家眼前呢部改裝TT1.8T，車主就為其加裝上一套ABT全車包圍；呢套包圍除將車頭及車尾部份向下拉，再配合車身兩邊裙腳，從而能營造出靠貼地面之感外，再襯以同樣屬ABT出品嘅尾翼、發出沉實聲響嘅四出式跑車尾喉，以及大口徑跑車合金胎軨等等，一份高性能跑車韻味，可謂完全徹底地展示出來。