今日係大年初三，先同大家拜個年，祝各位讀者羊年身體健康。今年大熱的各式盆菜，未知大家是否已一飽口福呢？
賀年禮品通常環繞朱古力、果仁、曲奇或蛋卷等。朱古力一向被視為女士們瘦身的天敵，一小粒（約十克）的朱古力就有五十卡路里熱量。坊間話果仁類含豐富的單元不飽和脂肪，對降膽固醇預防心臟病有幫助；個人亦同意這說法，但要留意一手滿的開心果就有二百多卡路里熱量，比普通一碗飯還要多，吃多容易致胖，大家在新春享用時要適可而止噢。
曲奇和蛋卷的可口鬆化，有賴製作過程中加入飽和脂肪如植物牛油，豬油等，食用大量飽和脂肪對身體膽固醇水平有害無益，不要一次過食晒整盒呀。
哪豈不是全部賀年禮品都唔夠「營」？其實又唔係，生果籃咪幾有「營」。生果一般低脂低熱量而高纖維，又含豐富維他命和礦物質，對身體有益又可幫助消化。近年開始流行送麵食的禮盒，麵含豐富的碳水化合物，既飽肚又不會令大家一次過食進過多脂肪，可謂送禮自用皆宜。
吃胖了的人不用擔心，羊年新春正是計劃瘦身大計的好時機，接着我會同大家一起計劃如可減肥、減磅、減得有「營」，下期見！
樊浚賢
英國註冊營養師
現駐診港島某私家醫院