喺香港打籃球打得叻，雖然未有耐到NBA咁高境界，但起碼可以免費去美國遊埠；四位贏得○一年adidas亞洲三人街頭籃球賽冠軍的港將譚偉洋、梁達成、黎國熹和伍智恩，獲免費到美國奧蘭多玩足三日，「嘩鬼四小街霸」當然盡情玩足七十二小時，實行玩轉奧蘭多！ 圖/文：盧漢傑
四小街霸未有受到二十多小時機程影響，到埗翌日，就與麥基迪會面；達成就最醒目，帶備即影即有相機，同麥基迪合照後即時畀佢簽名，達成說：「我會將簽名相放喺記事簿中，同學見到一定好羨慕。」
四小街霸跟着以車輪戰與T-Mac鬥OneonOne，阿洋一上場就被T-Mac一記轉身跳投擊敗、第二個達成眨眼間又敗下來；但阿恩竟憑老鼠仔身形、左穿右插下走籃成功，爆冷擊敗麥基迪。
原來阿洋已經第三次同麥基迪見面，阿洋說：「第一次係○○年菲律賓亞洲三人街頭籃球決賽，麥基迪做頒獎嘉賓；第二次係贏咗○○年冠軍後，前年到奧蘭多同佢食飯；今次第三次，佢一年比一年紅，不過簽名合照都冇托手踭，好nice。」
奧蘭多是美國東岸著名旅遊勝地，當然唔少得又平又靚嘅「FactoryOutlet」，四子一早就到兩間大型outlet掃貨，目標離不開名牌時裝同牛仔褲，原價五百港元以上的牛仔褲，半價就買到；近兩米高嘅黎國熹就掃了十幾條牛仔褲，佢說：「我咁高喺香港好難買到啱身嘅，今次買番夠本。」阿洋亦「大出血」使咗幾千元，佢笑說返港要慳啲。
晚上到魔術主場WaterhouseCenter睇魔術對太陽，四子跟主隊球迷為魔術打氣，可惜魔術最後以三分飲恨，達成說：「首次現場睇NBA，氣氛一流，睇到原來麥基迪、馬利安同A史杜達米亞咁跳得。」
奧蘭多出名多遊樂場，以刺激機動遊戲聞名的環球片場冒險樂園，就成為他們的首個目的地，可惜阿洋要為南華打工商盃，提早一日返港，四小街霸變成「三劍俠」。其中最搞笑就係三子玩蜘蛛俠立體動畫過山車時，竟在半路中途突然「死機」，被困幾分鐘先整番好，其間達成搞笑地用英文大叫：「Helpme！Spiderman！」（救命呀！蜘蛛俠）連身旁的外籍旅客也大笑起來。
喺環球片場三子也想買點紀念品，但價錢實在太貴，加上貨品大都是「madeinChina」，好冇癮咁打退堂鼓。
翌日三子到迪士尼樂園狂歡，可惜小記趕住回港度歲，錯過三劍俠與米奇老鼠的聚會。
