雖然今日係赤口，但新派人都唔會計咁多，浩浩蕩蕩跑去親戚屋企食飯拜年，成班人圍埋一齊無所事事，開賭耍樂就梗係在所難免，大人們細細哋搓番場衞生麻將，細路仔用利是錢買幾手魚蝦蟹，一於各有各賭，志在攞個彩發個新年財。不過先旨聲明，本文並非要宣揚賭博，但眼見咁多少年玩來玩去都得幾種玩意，又真係無咩新意思，所以趁住今日年初三，同大家介紹多種得意有趣、挑戰性大的賭場遊戲，大人細路都啱玩，只要付出少少抬返屋企，今年發新年財重唔輪到你！
記者：尹珊珊 攝影：陳穎、伍慶泉
ImageGirl：王穎 鳴謝：FONCALTD.
逢星期一至四刊出
就算現實中對賽馬一竅不通，呢部馬仔機一樣難唔到你。玩法非常簡單，每場賽事有6隻馬參賽，每次開賽前屏幕上均會以圖案顯示馬匹的狀態，例如在馬匹號碼後面亮有「先」或「後」的字樣，即代表一馬當先或後勁凌厲，跟着你可以再按馬匹的賠率，在彩票上落注買獨贏或連贏，接着賽道上便會顯示每隻馬的走勢同結果，除了考眼光之外，同時亦好講運氣，唔一定真係馬迷先可以發個新年財，最頂癮係過程中有晒前奏、馬蹄聲同馬迷打氣聲，令人有如置身在現場般，氣氛熱鬧又逼真。
呢副點心麻將可算為初哥度身訂做，佢嘅玩法同普通麻將差唔多，但牌數較少，比較容易食胡，每人每次持有10隻麻將（莊家多一隻），跟着輪流抽牌，直至最先排列到四組關鍵牌為之取勝，最頂癮係食胡變成食蝦餃燒賣，而最先開牌者需要叫「埋單」才算獲勝，十足十去茶樓飲茶。
輕巧的電視版老虎機，安裝方法好簡單，只要用電線接駁在電視上即可，遊戲共分有初、中、高級制，想進行極級挑戰亦可插入額外購買的遊戲帶，例如日本著名老虎機「獸王」遊戲帶（$198）。同時，此機唔單止可使用附送的銀幣，試過投入真的一蚊銀都同樣玩得到，大大增加了遊戲的刺激性。
呢部如手掌般大的輕便型遊戲機，分別有沙蟹、21點及俄羅斯輪盤，三款同樣是賭場上常見的玩意，對同𠵱家流行的GameBoy，呢部黑白畫面機的確稍為遜色，每部機得一個遊戲略嫌變化不大，但勝在設計唔算複雜，小朋友都啱玩，而且價錢夠抵，不妨買部同屋企人輪流比試一番。
唔好以為不過係派卡機咁簡單，只因隨機附送的特別版UNO卡，比平時玩開嗰種多了五款號令卡，例如抽中其中一款要將自己手中的卡同另一玩家交換，又或者要按下機身的Attack掣，分分鐘換來更大的懲罰，再加上此機設有發聲功能，更加刺激吸引。
JCShop
電話：31022783
地址：銅鑼灣時代廣場8樓833舖
備註：初四啟市
玩具反斗城
電話：27309462
地址：尖沙嘴海運大廈地庫032號
備註：全年無休
KANTOHOBBY
電話：27710100
地址：旺角彌敦道信和中心地下/12樓1204室
備註：初二啟市