既然拜年活動暫停一天，亦是連續四天公眾假期的最後一天，又食咗咁多日中式賀年糕點，係時候轉吓口味，投入西式賀年菜的懷抱，一樣咁有喜慶氣氛。「笨根菇」今年推出一系列中西合璧羊年開心菜，值得推介。
記者：邵超 攝影：陳永邦、周旭文
逢星期一至五刊出
已經是第三次跟Artichoke笨根菇的老闆Deon碰面，這人的背景很有意思，逢是「8」日便驛馬星動，父母是香港人，在越南做生意時生下Deon，他8歲隨姐姐到法國，18歲離開法國後到洛杉磯，28歲返港。正因這種跨文化的背景，Deon喜歡創新的東西，笨根菇開業半年，推出新菜的速度十分驚人，往往中西合璧，而且不時搵到獨家食物。
38歲的Deon如無意外應該繼續留港。沒有離開，因為這裏留下了對母親的思念。Deon對Artichoke（雅枝竹，貌似綠色的蓮花）有很深的感情，在法國時曾經病了九個月，久咳不愈，喝了媽媽煲的雅枝竹湯，立時痊愈。
「返到香港，媽媽喺美國仍然定期寄雅枝竹畀我，因為美國出品嘅平過法國貨。聽鄰居講，佢過身前一段日子，仍然推住車仔，到郵局寄雅枝竹畀我。我同雅枝竹，有唔可以拉斷嘅緣份，裏面有我對媽媽愛心嘅思念。」
Deon回想小時候在越南，陪母親買年貨的經歷，整條街道洋溢一片歡樂氣氛，此情此景已成為Deon最重要的回憶。
受病魔纏繞的經歷令Deon對雅枝竹產生興趣，後來在美國一些醫學研究報告發現，這種植物含豐富的蛋白質、維命他A、B、C和七種礦物質，又有抗癌和治肝病的效用。
「聽拍檔Joe講，有一個40幾歲患肝病嘅女人，每日準時嚟飲雅枝竹湯。佢喺美國醫病時，有一個教授喺卡片上寫上Artichoke，叫佢返香港後試吓嚟食，對病情有幫助。佢喺香港搵咗好耐都搵唔到，終於一次去灣仔探朋友時，見到我哋嘅餐廳名，佢當時真係好開心。能夠幫到人，我哋都好開心。我相信我哋畀心機，客人係可以食到我哋嘅心意。」
今年Deon會跟隨拍檔回新加坡度歲兼搵新靈感，將會有兩款新甜品推出，仍然是玩中西合璧，期待他的作品。
蝦天婦羅好鬼Cool
蝦天婦羅嘅薄荷版，炸粉混有薄荷碎，再點埋個薄荷醬，食落好Cool，但又唔會搶走大蝦的鮮味，幾特別吖！
清香肉撞濃蟹湯
一個個小袋裏包有雅枝竹、蝦肉和豬肉餡，非常甘香清甜，再飲埋勁濃蟹味的笨根菇湯，撞埋嘅味道都唔錯。
頂鮑翅夠清爽
頂鮑翅是富貴菜，加埋雅枝竹就好像洗盡鉛華一樣，清清哋更加可口，襯埋鮮菇湯，可謂相得益彰。
電話：28669028
地址：灣仔盧押道18號海德中心地下B舖
營業時間：星期一至六11:00am-12:00mn、星期日6:00pm-12:00mn
世界各地的新年菜都有不同特色，海港城各中西日食肆為迎接香港的農曆新年，炮製出不少應節意頭菜，不少今日赤口仍照常營業。大家吃得開開心心，邊有心情嗌交呢？
蔬菜爆汁易燙嘴
將日本傳統福袋變為素食，寓意袋袋平安。福袋裏藏有不少雜菜，咬落去蔬菜汁即時爆開，小心燙嘴。
地址：尖沙嘴海港城ZoneAG122號舖
電話：27303392
蝦膏鮮味爆棚
燒烤的過程中，蝦膏的鮮味完全散發出來，香味好吸引。
地址：尖沙嘴海港城ZoneAG110號舖
電話：27350733
金桔酸腩排甜
近日試過士多啤梨醬和梅醬排骨，這個金桔醬燒骨的味道酸酸哋幾開胃，腩排肉甜甜哋，啱晒食年糕食滯晒嘅朋友。
地址：尖沙嘴海港城ZoneB101號舖
電話：27304866