韓君婷為人原來相當傳統，認為農曆年初一應該要食齋，她日前便特別到周秀蘭開設的齋舖品嘗齋宴，順道買幾味齋菜回家，研究如何烹調，好讓自己親自下廚煮齋菜，留待農曆新年間享用。
韓君婷外表雖然相當洋化，不過提到中國人的農曆年習俗，她原來可以好傳統。身為基督徒的韓君婷，每年農曆年初一一樣按照傳統食素，減肥成功的她，日前到周秀蘭在銅鑼灣時代廣場的「寶光素食」茹素，兩人更大談初一食齋的傳統。
周秀蘭當日準備了多款素菜，當中包括金玉滿堂、竹林網鮑、佛林結善、彩虹豆腐及韓式炒飯等，她說：「中國人傳統通常大年初一都唔殺生，食齋會帶嚟好運。」
韓君婷見到周秀蘭為她準備的素菜已經食指大動，她自言每逢過年一定照足傳統習俗，韓君婷說：「淨係見到啲齋菜五顏六色已經好開心，其實我都好鍾意食齋，媽咪年年初一都一定煮齋，但係佢淨係識雜菜粉絲煲。重有包括初一唔洗頭呢啲傳統習俗都係跟足我媽咪嗰邊。」韓君婷吃罷齋宴，還帶幾味外賣齋菜回家，研究如何烹調。
韓君婷認為過去一年才是自己事業的開始，她說：「覺得自己重可以做得好啲，𠵱家已經賺到生活所需，下一個目標係買樓喇！都係中國人傳統，安居樂業嘛。」她亦表示來年希望事業順利，韓君婷說：「希望可以將過往學到嘅嘢好好咁發揮出嚟，入TVB之後已經大膽咗好多。」
採訪：卓美娟
攝影：何國豪
化妝：AhLu
髮型：RayMork（TripleEdge）
場地提供：寶光素食
