中國人最重視農曆新年，一啲喺海外搵食嘅中國球員雖然喺年初一都要打波，不過就踢得好起勁，除咗李鐵幫愛華頓贏列斯外，邵佳一亦都喺德甲聯首次登場，雖然佢效力嘅慕尼黑1860輸咗，但佢算打得唔錯。
李鐵雖仍未攞到佢喺超聯第一球，但喺羊年第一日，佢演出就認真醒神；喺愛華頓贏列斯二比○嘅比賽，第二球就係佢助攻交個靚波畀隊友拉辛斯基射入嘅，唔怪得賽後連愛華頓領隊莫耶斯都勁讚佢啦！
邵佳一效力嘅慕尼黑1860雖以○比一輸咗畀漢諾威，但1860喺二十六分鐘已經失球，而邵佳一係喺五十八分鐘先至後備入替，所以失球根本唔關佢事。佢首次喺德甲聯亮相，表現算唔差，我求大俠一於祝佢同埋李鐵愈踢愈好，為中國人爭光。
講開愛華頓對列斯場波，列斯認真唔掂，球星走吓一個又一個，領隊雲拿保斯嘅前途仍未明朗，路邊社消息重話喺場波打緊時，雲拿保斯有段時間唔見咗人，都唔知係咪冇眼睇。另外，列斯前鋒阿倫史密夫又趁火打劫，話要加薪，如果唔係就季尾走人……睇嚟列斯真係神仙難救。
喺上周六米杜士堡主場對紐卡素嘅超聯，因米杜士堡話大雪，雖然個球場冇問題，但怕嚟睇波嘅番士有危險而取消。紐記領隊卜比笠臣話米杜士堡因為啱啱以二比五輸畀維拉，想執番好隊波，特登取消比賽，重話唔排除作進一步行動，但米杜士堡領隊麥卡倫就話冇咁嘅事。我求大俠唔係偏幫紐記，但米杜士堡嘅理由又真係牽強啲喎！
另外一隊神仙難救嘅英超球隊，相信係新特蘭，佢哋喺上星期六主場以一比三輸咗畀查爾頓之後，做咗包尾大幡，最慘嘅重係佢哋陣中被喻為明日之星嘅中前鋒球員樸達，喺嗰場波三分鐘內連擺兩次烏龍，咁樣真係對佢自己同埋對隊波嘅士氣都影響好大，要追上實在談何容易。
我求大俠噚日起身一睇NBA啲戰果，幾乎俾馬刺對熱火嘅比數嚇一跳，兩隊加埋先攞得一百三十一分，係NBA歷來總得分第九低。大家都知熱火向來得分都好唔掂，但係點解連馬刺都咁屎波？一句講晒：衰大意、亂打一通！馬刺呢場波犯咗二十七次失誤，命中率得三成幾，唔輸都算行運，好彩噚日對住嘅係熱火……