早兩個禮拜我老友話想買部T100，貪佢一千蚊平平哋夠抵玩，但當時極度缺貨，行咗幾間舖都無，不過，家陣就貨源充足，唔單止係行貨，連水貨都有大把機，嗰日行經先達就見到啲T100一字排開晒，通常擺Display都係Dummy，最多都係擺一、兩部真機，數一數有成15部，部部都係堅，可想而知呢間舖「責」住咗好多貨，所以趁新年嚟個大傾銷，水貨七百幾有交易，而行貨就企硬九百幾至一千，唔係話鼓吹買水貨，不過七百幾的確係抵玩，不過部機有乜頭暈身㷫無原廠保養就唔好怨。
可謂無心插柳，過年前諗住打去諾基亞嘅Hotline問吓部影相手機賣緊幾多錢，但係就聽到2100已經有得賣，開價$1,008，2100特別在於機背有個透明窗可以放相，有ScreenSaver、遊戲，睇埋啲功能同價錢，似乎係打算同SonyEricsson部T100打對台。
同舖頭啲Sales傾開偈，點知俾我聽到阿甲店員同阿乙店員講，若然見個着乜衫同乜褲兼戴眼鏡嘅女仔問某牌子嘅機價，千祈唔好報畀佢聽，我八卦問吓，原來Sales話有某手機商一向都要舖頭跟住佢哋嘅訂價賣機，若然舖頭唔跟住做自行賣平啲，而又俾手機商發現，分分鐘唔派貨畀舖頭喎！或者手機商怕價錢同自己嘅專門店相差太大，而點先知道啲舖頭有無照價賣，最佳嘅方法就係放蛇喇！所以當啲Sales憑佢哋嘅專業眼光知道邊啲唔係真客嘅時候，就會提其他同事，佢哋話費事中招喎！
我羅新基除咗行街外，亦會上啲手機網站睇吓有乜新產品，最近就發現原來西門子將會推出一系列似飾物多過似電話嘅新機。成個系列叫做Xelibri，會好似時裝咁分春夏同秋冬兩個系列，擺明玩Fashion，就好似呢款似吊墜嘅電話，不過，睇真啲原來只可以打出打入齋聽電話，果然係玩Fashion得個樣！