噚日一年一度嘅「國泰航空國際匯演賀新禧」花車巡遊滙演，喺添馬艦廣場舉行，八方特來贈興，即刻去搵國泰董事兼常務總裁陳南祿拜年。點知八方重未開口問陳生攞利是，就俾個鬼佬截胡，猛咁要陳南祿同佢簽名，搞到陳生鬼咁開心，重唔記得畀利是八方㖭。
八方起初都唔明，陳南祿又唔係明星歌星，點解會有「fan屎」問佢攞簽名？於是即刻走去問個鬼佬點解要向陳生攞簽名，而唔係攞利是呢？原來個鬼佬叫阿Cliff，來自南非。阿Cliff話，好鍾意去旅行，美國、日本同加拿大都去過。阿Cliff重同八方講，每次去旅行都會坐國泰嘅飛機，話貪啲飛機夠舒服同安全喎。阿Cliff重話，本來唔知陳南祿係乜水，但喺本巡遊場刊印咗陳南祿嘅個人資料，睇完之後先知陳生咁勁，於是決定向陳生攞簽名。
（圖）陳南祿（右）估唔到自己咁受歡迎，有「fan屎」問佢攞簽名。
傳真︰2623-9278
電郵︰