不知何時開始，大年初二等於了煙花！毋須刻意宣傳，擁有海景靚位的餐廳、酒店，一早俾人Book晒。先前沒Book定位，今晚又唔想企街同人迫？以下介紹的餐廳將是你最後博一鋪的好去處。其中擁有無敵景觀的山頂麵店，更有性格地講明不受預訂，是日先到先得。更重要係冇趁火打劫，一百蚊樓下可以落樓，真係去邊度搵？
記者：吳佩璇 攝影：黃叔榮、梁細權
Model：Andrew、Ebansa、雪盈
$80有煙花伴碟
所謂的煙花餐，閒閒哋都要四、五百一位，而位於山頂的EatNoodles則每人最低消費只$80（另設加一），可以在無遮無擋的山頂露台，邊睇煙花邊食晚餐。這裏主打東南亞食物，分室內及露台位，分別可容110及70人。
由於不設預訂，想坐露台位睇煙花就要趁早霸位，今晚餐廳約於下午5時半至6時左右，開始清場，大約6時半至7時恭候入座。根據往年經驗，有人4、5點就嚟排定隊，事關70個露台位中，只約30個係完全靠邊。
咖喱雞飯是這裏最受歡迎的食物之一。咖喱汁亦是以椰汁、咖喱粉等自家調校。雞全為雞扒肉，一早去骨。加上微辣味道，一口一口停不了。
這裏的叉燒乃用獨特的泰式醃料自家燒製，味道沒我們食開的叉燒那麼甜，亦沒那麼肥。加一個以豬骨熬成、沒加味精的泰式湯底，豬骨味濃，入口鮮甜。
名字趣怪的這杯飲品，實情是一杯果汁大雜燴。用檸檬汁、橙汁、菠蘿汁、紅石榴及梳打水混合而成。味道酸酸甜甜，乃樣靚味道好的健康果汁。
EatNoodles
電話：28495777
地址：山頂道128號凌霄閣201號舖
營業時間：11:30am-11:00pm（平日至9:30pm）
小型新春跳蚤巿場
這裏雖只得十多個攤位，但適合一家大細。攤位內容包括精品、傳統手工藝及賀年吉祥物等。年初三當日更會有中國書法家即場表演中國書法。而且凡於2月15日或以前於凌霄閣指定商舖消費滿$80，即可免費獲抽獎券一張。頭獎為鑽石戒指、二獎及三獎為逾千元現金餐券。其他還有護膚禮品、相機及各現金購物券，逾50多份。即管來碰碰你的運氣。
地點：山頂凌霄閣5樓觀景臺（免費入場）
日期：今、明兩天
時間：11:00am-6:00pm（年初三延長開放至11:00pm）
今個新年，杜莎夫人蠟像館內過百名巨星依然年中無休，而且更於農曆年這幾天延長開放1小時。館方更舉辦了「鄧麗君名曲齊齊唱」活動，由即日至2月16日，鄧麗君蠟像的舞台旁，將安放一套音響連咪高風，供愛好唱歌者使用。每名參觀者有機會演繹一首自行選擇的鄧麗君經典金曲。
另外，成龍蠟像將在農曆年假期換上鮮色的傳統唐裝衫，要留念，可拍下照片，並以專業用的蠟像紀念紙夾框起，每張$65。
地址：香港山頂道128號凌霄閣2樓
入場：成人$85；兒童、學生及長者$50
電話：28496966
營業時間：11:00am-9:00pm（年初二及三）（平時開放至8:00pm）
除了經濟之選，也為大家介紹豪食之地，尖沙嘴區也有睇煙花嘗美食的好地方。
想食得豪一點，可到酒店餐廳。擁有無敵海景、兼一眼睇晒對岸會展、中銀的喜來登酒店SkyLounge，剛耗資720萬豪裝，約三星期前才重新開幕。這裏一向只過時過節才有晚餐供應，今晚亦特設4道菜，包括前菜蟹餅伴日本莧菜、雜菌忌廉龍蝦湯、海鱸魚配大蘑菇或羊架配千層茄子，及橙味焦糖燉蛋。訂位情況踴躍，今日將設WaitingList，未有着落即管試試。
主菜有鱸魚及羊架任揀。前者賣相別致，底層為大蘑菇，中間為南瓜茸、莧菜、鱸魚，面層則是用芝士粉及麵包糠打製的脆漿，入口鮮美。後者為新西蘭羊肉，肉質軟腍不太羶。
這個傳統法式焦糖燉蛋，甫進口滿溢橙香，面層又脆又香，焦糖燒得恰到好處。裏頭的橙味燉蛋甜而不膩，記住留肚食。
SkyLounge
電話：23691111ext.4
SetDinner價錢：$498加一
地址：尖沙嘴彌敦道20號喜來登酒店18樓
營業時間：2:00pm-2:00am
除咗山頂，要平又要有靚景兼唔使Book位，港島區都一樣搵到。就以世貿中心為例，裏頭不少價錢大眾化的餐廳，都有維港SeaView。
意粉屋食啲乜相信唔使多講，新春佳節更推出了熱鍋套餐及精選優惠餐。不過提提大家這間意粉屋面積較細，而且靠窗位只得三張枱，餐廳方面話是日不會作甚麼特別安排。所以，想有靚位坐，穩陣起見都係早啲嚟等位。
來自加拿大的鮮蠔，煎過後跟野菌一齊煮，再配埋樣靚的蝴蝶粉，師傅試味時話味道特別夾。
用澳洲一級龍蝦肉配菠蘿、蘋果、蜜瓜、士多啤梨等生果。鮮紅生猛的龍蝦，取意紅龍賀歲，有意頭又好味。
以秘製的龍蝦湯，配帶子、魚翅一齊煮，過時過節不妨食豪啲。
意粉屋
電話：29722143
地址：銅鑼灣世貿中心1樓P113號舖
營業時間：11:00am-11:00pm
離開銅鑼灣，來到灣仔，一樣有霹靂無敵靚景。好似位於藝術中心的雅廚，二百多座位中，約三十多個露台座位可近觀煙花盛放，會展新翼亦近在咫尺。
今晚以Buffet款客，有關方面重預留20-30個座位給WalkIn散客，重唔行快步！
雅廚
電話：28272923
地址：灣仔港灣道2號香港藝術中心6樓
營業時間：6:00pm-10:30pm（Buffet由7:30pm開始）
收費：每位$268加一（成人）；$168加一（12歲或以下小童）
萬一意粉屋等唔到好位，不妨走上一層去麥當勞。雖然坐得冇咁舒服，但勝在有無敵大玻璃，景觀比意粉屋要好。況且二十蚊有個餐兼送無敵海景，重想點呀？
麥當勞
電話：25779125
地址：銅鑼灣世貿中心商場209B-210
營業時間：7:00am-11:00pm
就近好去處
適逢時代廣場的city'super舉行青森節，去開呢頭不妨睇睇。青森出名盛產蘋果，屆時會有各式各樣用蘋果製造的食物及飲品，不妨來添些特色賀禮。
city'super
地址：銅鑼灣時代廣場地庫
電話：25062888
營業時間：10:00am-11:00pm（青森節至2月4日）
就近好去處
大人細路都鍾意的小熊國，今個新年同你齊齊過，搖身變為喜氣洋洋的年宵巿場，除糖果禮盒，還有小熊國別注版亨亨桐桐揮春、風車、掌相攤位等。而且重有12隻化身各個生肖的小熊陪你影相，得意又有意思。
小熊國
電話：21302130
地址：尖沙嘴梳士巴利道12號亞馬遜P1-P2（新世界中心旁）
營業時間：10:00am-12:00pm（平日為10:00am-10:00pm）
收費：成人$50；3-11歲小童及65歲以上長者$25；3歲以下小童免費。
不少本地旅行社都有舉辦煙花船河，未曾預訂的，可試試以下這家。有關方面將視乎情況盡可能接受散客。參加者將乘船遊覽維港兼吃DinnerBuffet。另加插大抽獎環節。
發達行
電話：23950788
團號：會展明珠煙花自助餐團（FIE3）
收費：成人$198；小童$188
集合時間：5:30pm 集合地點：尖沙嘴碼頭