香港人睇日劇應該睇得唔少，鏡頭前男嘅英、女嘅索當然不在話下，但係我羅拉可以好大口氣咁講，大家應該冇乜點睇過日劇幕後場面，鏡頭前好型嘅主角，分分鐘變咗另一個樣，等我羅拉趁過年，送個小禮畀各位日劇迷啦！
萬人迷木村拓哉套新劇《GoodLuck!!》勁收，真係乜face都幫佢攞番晒，聽啲睇過套戲嘅fans講，木村喺劇入面型到爆，尤其係佢喺夏威夷曬太陽嗰幕。原來拍一幕咁簡單嘅戲，都要十幾個工作人員服侍，而木村大爺未埋位重瞓番陣先開工㖭！
至於木村愛將柴崎幸喺套戲度就做專業飛機修理員，雖然佢着起套制服就真係「着起龍袍唔似太子」，但未埋位時有擦鞋工作人員話套衫好襯佢，佢都即刻笑到見牙唔見眼，真係易𠱁。
今次重唔俾我羅拉捉到痛腳？專賣陽光美少年形象嘅加藤晴彥原來好怕凍㗎！雖則話𠵱家日本重係寒冷嘅冬天，加藤兄日日要同菊川怜一齊拍《警察一朗》亦好辛苦，但都唔使一離開個鏡頭就黐到個暖爐實一實吓？
上戶彩小妹妹喺新劇《高校教師》入面做個乖乖女學生妹，相反性感少女SONIM就壞到出汁，但鏡頭後彩妹戴上副黑超，而SONIM就紮起孖辮，同角色性格好似啱啱相反喎！而且彩妹喺鏡頭後居然同新紮哥仔成宮寬貴咁親熱，小心緋聞男友森田剛哥哥嬲呀！
今井翼話晒都係尊尼仔嘅一分子，唱歌跳舞係佢老本行，拍戲時唔晒吓舞技？NoWay啦！佢重要教《最後的律司》嘅其他演員跳埋一份㖭呀！睇阿部寬同須藤理彩個樣，又好似幾enjoy喎！