上月底，日本各大車廠先後公布2002年嘅業績數據，屬日本大廠之一嘅本田亦唔例外，佢哋亦於1月27日公布有關數據；繼旗下Fit（即港版Jazz）榮登2002年全日本汽車銷量冠軍寶座後，就連本田本身響去年於日本本土嘅銷量，亦錄得有上升嘅趨勢啦！
本田車廠響去年於日本本土市場，合共售出902,658部新車，當中人氣小車Fit佔上大多數（全年共售出250,790部）之餘，重係廠方響汽車銷售總數上連續第4年上升；除此之外，全年汽車製造數量亦有所上升，當中日本本土佔1,386,379部，較2001年上升7.9%，而全球各生產線合共生產咗2,900,787部新車（較2001年上升9.4%）。除此之外，去年全年汽車出口數量亦有475,796部，較2001年勁升14.5%，成績絕對稱得上係出眾。相信今年本田車廠嘅業績，一定會較去年更好呢！