過癮概念車：
福特ModelU萬事得Washu概念迎未來

響早前於美國底特律舉行嘅北美國際車展上，各大車廠都有展出由旗下設計師所精心設計出來嘅概念車，並備受在場車迷注視，當中尤以福特ModelU同埋萬事得Washu至為吸引；雖然佢哋能否正式投產仍屬未知之數，但不如今日一齊嚟先睹為快，睇吓呢啲未來之車有幾吸引啦！

記者：鄭達基

環保引擎好力慳油
用於呢部ModelU身上嘅，係一台以氫氣作驅動燃料嘅ICE（Internal-CombustionEngine）引擎，呢台偈不但能輸出118ps/4500rpm馬力，響一套MHTS（ModularHybridTransmissionSystem）輔助下，亦能有更出色嘅性能表現，以及能夠造出更低嘅耗油紀錄，而且重有接近0%嘅污染度㖭！真係夠晒環保㗎！

獨特造型惹人注目
呢部ModelU用上最先進嘅鋁合金車身結構，既輕巧又紮實之餘，三廂式獨特造型設計，亦見有一份吸引力；同時，對開式車門設計，亦能令乘客於上落車時變得更方便呢！除此之外，一組頭燈亦屬新設計，不但有更高照明度，而且電腦重會根據各項數據，如車速及軚盤轉向角度等等，去計算出最佳嘅照明範圍，從而令晚間行車變得更安全㗎！

車廂配備先進實用
ModelU嘅車廂布局除以寬敞實用為賣點外，後排座椅更可按需要收摺放平，以增加尾廂載物容量；另外，廠方亦為ModelU裝上一套語音對應系統，屆時你只需講出簡單嘅指令，車上一套電腦便會自動執行你所指示嘅工作，例如想打電話畀朋友，你只需說出朋友嘅名字，電腦就會自行為你打出電話，如果想聽音樂，你亦只需講出想聽邊位歌手嘅樂曲，電腦便會自行為你安排以MP3形式儲存嘅樂曲，從而變得更方便呢！

萬事得Washu
前衞造型帶有活力感
為迎合不同用家嘅口味，響車展會場上展出嘅萬事得Washu概念車，可謂既前衞又滲有一份活力感；除車門可作大幅度開啟（如左圖），方便乘客上落或提存行李之餘，頭燈更用上LED技術，照明度較傳統頭燈光亮及更高耐用度，而且重備有先進AFS（AutomaticFocusingSystem），頭燈會根據軚盤轉向角度而調節照射範圍，咁就算響晚間行經多彎嘅路段都無有怕啦！

座椅多變富實用性
與現有MPV一樣，Washu概念車嘅車廂亦擁有多變嘅車廂布局，座椅可按需要收摺放平，以便運載更多行李；而座椅亦見有高承托力，乘坐倍見貼服舒適呢！另外正如前文所述，此車擁有面積闊大嘅雙趟門，方便乘客上落車外，就連駕駛席嘅軚盤亦可自由移動或收藏於表板內，以便駕駛者離開車廂；而車上重備有LCD螢幕及DVD影音系統，從而讓乘客可於長途行車時觀看電影，令旅程不再沉悶。

3.5V6偈動力強勁
雖然廠方暫時未有公布，關於機械配搭方面嘅詳細資料，但暫時知道會以一台3.5公升V6引擎作動力核心，馬力輸出約為245ps/6500rpm，扭力輸出約為29.0kgm/3500rpm，輔以一套6前速自動波箱，性能表現倍見出眾；而由前輪雙搖臂及後輪多連桿，所組成嘅懸掛系統，亦能令呢部Washu有出眾嘅路面循迹性呢！