假日求驗客手記:丹麥唔攞人便宜抵讚

假日求驗客手記:丹麥唔攞人便宜抵讚

噚日係大年初一,我求大俠掛住周圍「刮料」,冇同大家見面,一於喺今日大年初二同大家拜年,祝大家橫財就手,萬事如意!踏入羊年,我求大俠仍然會不平則鳴,見到古怪嘅事要求驗,見到啱嘅事會讚,見到唔啱嘅就鬧。
言歸正傳,喺新正頭第一次同大家見面,我求大俠就想讚吓嚟香港踢賀歲波嘅丹麥隊喇!
話說喺臨完上半場前,伊朗球員聽到場邊球迷嘅雞聲,以為球證鳴笛完場,竟然喺自己禁區內執起個波,咁球證趙善銓就依正例判罰伊朗十二碼。
不過,丹麥不脫北歐人有風度同埋有體育精神嘅本色,隊長韋荷斯好醒目咁喺徵詢過教練M奧臣意見後,特登將個波踢出界,引嚟全場掌聲。
而伊朗嘅球員重主動同韋荷斯擊掌同埋握手㖭!雖然丹麥最後輸咗,但係佢哋嘅體育精神就好抵讚。

科木「義助」羅馬簽人
羅馬響前個禮拜六吞科木兩蛋,賽後重俾科木個教練暗寸,不過羅馬能夠響球員轉會市場關閉前五分鐘簽入前鋒馬拉仙拿,就要多謝科木成人之美。點解?如果唔係科木放比積蘭奴域去基爾禾,基爾禾就一定唔肯放走馬拉仙拿。所以話,江湖無永遠敵人。

擔心保頓亂石投林
話咁快季中嘅轉會限期又過去,唔少球會都補入咗球員,而最騎呢嘅都算係保頓,佢哋領隊艾拿迪斯似乎冇受上季季中大肆班兵,搞到隊波幾乎降班嘅教訓,季初補入唔少球員後,近日又借用前鋒沙華等四名球員。須知道人腳變得太多太快難有好結果,真係替保頓擔心。

打比郡冇咗五件惡搞
講開轉會,如果我係英甲聯球隊打比郡嘅會長,就真係唔知笑好定喊好。因為打比郡財困等錢使,所以喺轉會限期時就一口氣送走咗潘姆、般頓、希堅保咸、基士堤同埋拉葛特呢五件有質素嘅球員。雖然咁樣佢哋嘅財政狀況係有改善,但冇咗咁多件,又點爭取好成績呢?

桑坦德老細腦細咪捧
前三級跳好手比達文早前做咗西甲聯球會桑坦德新任老細,上場後即刻以實際行動表現出佢熱愛足球及球隊嘅心情,包括親自落場教波,以及託李華度幫手,希望簽得巴西老將羅馬里奧返嚟。我求大俠睇佢咁嘅作風及行為,就似乎太過不切實際,唔怪得班波最近愈踢愈沉,奉勸各波友都係咪捧佢哋住,睇定啲先。

卡達為波鞋唔讓波神
麥基迪同艾華遜都話讓個東岸正選位置畀最後一次打明星賽嘅米高佐敦,惟獨被球迷評為最唔值得入明星賽嘅卡達,竟講明唔會咁做。我求大俠相信卡達死唔肯讓位,無非想為佢推出冇耐嘅新鞋爭取曝光機會,否則佢分分鍾可能俾Nike飛起!

丹麥教練M奧臣