張堅庭開設的「表哥粥麵專家」，應新年推出八道極具創意的賀年菜式，如希望今年免加稅的「橄欖免肉稅」，勉勵港人逆境要樂觀的「哈蝦大笑」，但最得意還是以熱門話題《基本法》二十三條為題的「天麵廿三條」。
張堅庭去年投身飲食界開設「表哥粥麵專家」，憑着創意火速在茶餐廳飲食文化突圍而出，最新大計是發展私房菜及開甜品店。
今年農曆新年，阿庭創作出八道勉勵港人的賀年意頭菜式，他日前說：「因為香港人今年可能環境唔好，甚至可能衰到貼地，搵唔到錢，不過我都希望大家能夠保持心情開朗，唔需要去大酒樓食好貴嘅賀年菜，但係都唔好餓親，有做節過年嘅感覺。」
八道菜式最特別的地方，是充份反映了港人的願望，阿庭說：「好似『橄欖免肉稅』就希望今年唔好再加稅，而『哈蝦大笑』就叫人保持積極樂觀的心境，雖然今年市道唔好，好多人失業，但希望佢哋唔好咁悲觀，咁先可以戰勝逆境。」阿庭還應近日香港熱門談論話題《基本法》二十三條，以豉油王炒麵創出「天麵廿三條」，以及與太太楊諾思（Cindy）合力炮製極具意頭的「福多士」。
問阿庭農曆新年有甚麼傳統習俗時，他說：「我喺屋企好民主，唔使斟茶叩頭，你估啲細路係奴隸咩？」但Cindy就有很多習俗，阿庭說：「佢（指Cindy）以前成日去借庫，幾億幾億咁借，佢又會去『攝』太歲。」
阿庭還笑言有三個小朋友收利是，有賺冇蝕，他說：「雖然我係要派利是，不過三個細路人數多，出到去一定『殺晒』。不過我話Cindy好似阿婆咁，將細佬仔啲利是錢成幾萬蚊擺晒喺鐵罐入面，舊年俾人入屋爆竊偷埋，我已經諗好晒理由，等佢哋大個，話畀佢哋聽捐晒畀慈善機構。」但在旁的Cindy即反對說：「咁唔得，我會拎番晒出嚟，幫佢哋開戶口或者買股票。」
採訪：RitaLeung 攝影：ChanChiLam
場地提供：跑馬地表哥粥麫專家
