鄭中基（Ronald）矢志在娛樂圈突圍而出，近日搖身成為新一代笑匠，他在賀歲片《行運超人》中的出位表現，更被喻為周星馳接班人。Ronald更表示今年已訂下目標要以後有份參演的電影人人愛看，出的唱片個個想買，現在的他已懂得珍惜眼前的一切。
年前鄭中基因在飛機上醉酒傷人而影響事業，處於人生低潮，但近日因參演賀歲片《行運超人》而成為新一代笑匠，事業終見起色，他在戲中扮女人的一幕尤其出位，搶盡男、女主角梁朝偉及楊千嬅風頭，被喻為周星馳接班人，Ronald說：「有人認同梗開心，最開心係大家知我會扮女人，但睇嘅時候仍然可以笑死你。但我唔係周星馳接班人，我𠵱家先啱啱起步，唔想有太大壓力，我怕人哋對我期望太大，下次會覺得冇咁好笑。」
原來Ronald在戲中扮女人跳舞一幕，是他自己的構思，當他得知要扮女人去網吧見工，便看電影《艷舞女郎》作參考，他說：「咁我去得網吧見工，一定係有苦衷，冇理由係好開心咁去，於是做啲好幽怨嘅眼神，講嘢嘴形要戚戚哋，陰滋滋咁，其實我有試過扮癲婆同十三點，但導演都係覺得幽怨最好。」
Ronald平時喜歡看黑人喜劇，如愛迪梅菲的《妙探出差》等，Ronald說：「黑人笑片比較接近香港人拍嗰啲，佢哋好識自嘲，賤得嚟又真係反映到現實，咁先最易引人笑。港產笑片我最鍾意周星馳嗰套《喜劇之王》，演員做得好又實在。」
Ronald扮女人好笑，李健仁扮的「如花」及劉以達扮的女鬼亦令人噴飯，問Ronald覺得他們三個扮女裝的造型誰最漂亮？他故作忸怩地說：「梗係我靚女啲，我身材好過佢哋，隻腳都蕭湘啲啦，佢哋扮女人重有鬚根㗎。哈哈，其實冇得比較，我喺戲裏面係要扮真女人，係你哋笑我咋嘛。」
三個「女人」要他揀一個做老婆，Ronald會揀誰？他露出驚恐表情說：「睇怕係男人都情願吞劍自盡。」
Ronald認為惹人發笑難過引人喊，他說：「引人喊只要有好好嘅音樂，或者感人嘅對白，感動到人就可以，引人笑就要捉到成場戲嘅節奏，時間要配合得好好。我唔怕搞笑會影響歌手形象，我對我把聲好有信心，我𠵱家嘅理想係出嘅碟人人想買，拍嘅戲人人想睇，咁就真係行運。」
Ronald回想起當日傷人事件發生後，不少朋友離棄他，他感慨說：「我一開始做歌手，有好多來自四方八面嘅人走嚟對我好好，出事之後，好多人又向四方八面咁閃，最難受係有啲所謂好朋友，平時一齊玩，竟然喺報紙話其實同我唔熟。最近嗰啲『唔熟』嘅朋友又蒲番頭，我唔會刻意唔理佢哋，但我知乜嘢人可以做朋友。」
Ronald表示最近他想通了，一切要靠自己，他說：「如果唔係發生咁多事，條路未必係咁行，人係要遇到挫折，先會從中學習，執番好自己，去迎接未來。如果唔係有咁多經歷，可能我重係個自以為是嘅戇居仔，有機會未必識把握，未必識付出，用心去做嘢，我𠵱家識得珍惜眼前嘅一切。」
採訪：蔡如玉 攝影：仇志德
服裝提供：中藝
場地提供：陸智夫國術總會
