贊助商嘉士伯今年喺球場入口免費幫入場球迷畫面,就相當受球迷歡迎,攤位要大排長龍,令到負責嘅工作人員忙到完全冇機會停手;不過,球迷一般都只喺排幾分鐘就輪到,而唔少家長重帶埋小朋友一齊畫花面睇波㖭。
今年賀歲波戲碼比起過去幾年差咗些少,所以噚日只得約二萬一千個球迷入場,但現場氣氛依然相當唔錯。球迷全場不停揸住贊助商所派嘅吹氣膠棒,為所擁護嘅球隊打氣,現場氣氛真喺相當熱鬧;加埋兩場波快上快落,戰情可觀,冇入場嘅球迷真係有啲損失。
頭場丹麥全場佔到壓倒性攻勢,但最終都要輸波而回,而伊朗下半場多次用佢哋最慣常嘅「詐傷」戰術拖延時間,就令到在場球迷唔多滿意,尾段一面倒幫丹麥打氣,而球迷完場重以噓聲送伊朗離場。