年初二，又屈埋喺屋企打四方城咁悶局？
今日出街，重有大把好節目，去海洋公園玩雪、蒲嘉年華玩機動遊戲、趁騰龍墟許願、行大笪地接財神、踩入小欖跳蚤市場飆車、去新世界中心睇Show……重唔夠喉？蒲通宵吧、釣埋通宵魚又點睇？斷估總有瓣啱你心水啩？
記者：陳漢榮 攝影：傅新發
模特兒：Lydia
玩真雪睇飛天小女警
年初二嘅海洋公園，卡通人物大晒，除免費播放《飛天小女警》精采卡通片外，重有威威獅令巨型氣球，啱晒小朋友口味。香港幾凍都無雪落，想玩真雪，海洋公園嘅「雪玩場」亦不作他選。
花花、泡泡、毛毛、馬騮阿祖、于東林教授齊撐場，播放《沖洗相片》、《代課老師》、《蟑螂的陰謀》等6套卡通片，小朋友有機會同一眾卡通人物見面，一齊唱歌、跳舞、拍照、玩遊戲。
收費：全免
播放時間：10:30am、12:30pm、4:00pm、6:00pm
見面時間：11:30am、1:30pm、3:00pm、5:00pm
吹氣競技城，集攀石、神奇摩術貼、滑梯於一身，活躍好動嘅小朋友玩極唔厭。
收費：全免
財神拎住大大個金元寶派利是，內有朱古力，食得唔好嘥，卡通人物利是封，則極具收藏價值。
海洋公園
地址：香港香港仔黃竹坑（28738888）
營業時間：上午10時至晚上8時
入場費：成人$180，3至11歲小童$90。
全場53個機動遊戲連攤位，睇怕你未必玩過晒，新增嘅2個遊戲攤位，勁易玩，中獎機會率極高，以小博大，掟番隻巨型毛公仔返屋企，咪當發筆另類新年財囉！新增機動遊戲則有迷你版兒童碰碰車，一家大細入場唔怕悶親小朋友啦！
射龍門──Goal（H29）
守門員勁蠢，淨係識左右移動兼速度奇慢；龍門勁闊，唔係盲嘅都射得入，Lydia掟第二次已經中獎，玩到熟晒要擰轉身掟，死未？
收費：2個代幣換4個足球
獎品：入2球得細獎，3球得中獎，全中得大獎。
掟大大個呼拉圈超易中，唯一難度係呼拉圈要完全穿過地台先當中，工作人員話：「開檔兩日，送咗差唔多30隻熊！」值博率勁高噃。
收費：2個代幣換3個呼拉圈
獎品：清一色5呎高巨熊1個
工作人員對住小朋友大嗌：「轉彎！轉彎！唔好撞落車胎度，要撞其他車至好玩㗎！」可知迷你版碰碰車點炒都無有怕。
收費：2個代幣
旋轉木馬
呢度添咗唔少新年布置，勁有過年Feel，大人細路都啱玩，氹氹轉，咪當新年行大運囉。
收費：2個代幣
講意頭啫，轉呀轉，轉晒啲衰運走，希望玩完真係會幸福啲啦。
收費：成人3個代幣，小童2個代幣
查實靈唔靈真係唔知，不過所有投幣會捐畀福幼基金會，做善事，好心有好報，許過願都靈啲啩！
環球嘉年華
地址：前啓德機場停機坪（83339877）
營業時間：中午12時至晚上11時
玩雪場五攤位任玩
場內共有5項攤位遊戲，氣溫長期保持8℃，玩幾耐都唔怕冷親，放心！重有隻人咁高嘅抵死企鵝滿場飛，咪怕醜，捉住佢影相留念啦。
收費：$10
玩法簡單，瞄準紅心掟雪球，掟中小丑受罪，金銀灑滿身，最過癮係掟幾多次都得。
又係掟雪球，幸運輪旋轉速度勁慢，掟中紅心會講聲「恭喜發財」，新年流流最緊要意頭，掟唔中咪走呀。
必玩攤位遊戲，小朋友可以砌雪人、互相掟雪球，盞鬼。
魚竿無魚鈎，只得一粒磁石，假魚嘴有鐵粒，由於接觸點細，好考眼界，叫做有啲難度啦。
三個假雪人，影相留念最佳位置。
某攤檔老闆話：「一定要拜許願樹，因為騰龍墟近黃大仙廟，棵樹有靈氣，求財有求必應，唔許番個願就笨。」收到！重唔拿拿臨擺低兩蚊，買張許願卡，許番個願？今日重有粵劇表演（頭場2:00pm至5:00pm，尾場7:00pm至9:00pm），大唱《賀年曲》、《鳳閣恩仇未了情》等折子戲，老人家至Buy。
講緊係鐵線假花（盆景$28至$188，散枝$15起），雖然話初一就應該買定年花，但假花就好在唔使淋水兼長擺長有，你又點睇？
店名：精晶精品店（D37）
經典荔園玩意重現，不過老實講階磚細細，中獎難度頗高，想貪得意懷舊吓，一玩無妨。
店名：皆大喜歡
收費：$10換5個金幣
獎品：細獎利是封，中獎毛公仔，大獎巨型米奇老鼠
騰龍墟
地址：黃大仙上邨重建區
營業時間：上午7時至晚上9時