經過一年的忙碌，每年春節均有不少紅星趁假期到外地旅遊，他們平日走遍世界各地工作，但會選甚麼地方旅遊呢？曬得一身黝黑的古天樂，今年就計劃與朋友去東馬來西亞潛水，度寧靜的新年。而楊千嬅則決定與家人往歐洲旅遊購物。
不少藝人會趁農曆年的幾天假期出埠旅行，古天樂計劃與朋友去東馬來西亞潛水，自從學懂潛水後，古仔雀躍地說：「我一直好鍾意海底嘅寧靜感覺，所以趁農曆年有幾日假期就好想再去潛水。東馬來西亞嗰度，有好多好靚嘅小島，以前我都同朋友去過潛水，所以好想再去。」
旅遊地點：東馬來西亞
特色：潛水及原始森林
天氣：長年如夏
美食：辛辣美食及海鮮
國際巨星周潤發會與妻子陳薈蓮到印尼民丹島暢泳，發哥說：「我同老婆都鍾意有陽光同海灘嘅地方，而民丹島聽講風景好靚，所以今年想同老婆去嗰度休息幾日，玩完返嚟又要有排忙。」
旅遊地點：民丹島
特色：Spa、原始風味度假村及各項水上活動
天氣：氣候溫暖，全年溫度在攝氏24—33℃之間
美食：海鮮
楊千嬅因去年工作太忙，沒有時間與家人相聚，所以她在農曆年向公司申請放十多天大假，與雙親和弟弟去歐洲旅行，千嬅說：「我想同屋企人去遊歐洲好耐，但都冇時間，趁過年冇咁忙先至可以放長假。歐洲咁多地方之中我最鍾意倫敦，因為倫敦唐人街啲中國菜幾好食，啲服裝都唔錯，我又可以趁機會Shopping。」
旅遊地點：歐洲，包括倫敦
特色：遊覽倫敦眼、大笨鐘、白金漢宮及名店林立
天氣：天氣寒冷
美食：燒牛扒、炸海鮮
容祖兒：「過年我應該有三、四日假，所以打算去近近地嘅地方，我諗住去台灣，因為平、靚、正，又有好多好嘢食。我去親台北都會幫襯中泰會館入面間泰國菜餐廳，佢哋啲綠咖喱整得好好味，夠香、夠辣，好食過香港，重會去陽明山浸溫泉，我覺得台灣有好多地方都好靚，可以住下台南啲茅屋都幾好，夠得意吖嘛。」
旅遊地點：台灣
特色：浸溫泉、各大小夜市及街頭小食
天氣：天氣與香港相若
美食：麻辣火鍋及台式小食
陳松伶去年參加無綫遊戲節目《智在必得》時，贏取了一層價值八十八萬的廣州碧桂園洋樓。新年期間，松松打算抽兩三日時間，與家人到廣州旅行，順道在新居逗留數天，松松說：「間屋最近裝修好，咪諗住同屋企人住幾日，睇吓啲裝修囉，而且有朋友送咗一張七千幾蚊嘅麻雀枱畀我，已經擺咗喺新屋度，我都好想見識吓呢張價值連城嘅麻雀枱。」
旅遊地點：台灣
特色：浸溫泉、各大小夜市及街頭小食
天氣：天氣與香港相若
美食：麻辣火鍋及台式小食
部份圖片：《壹週刊》、《飲食男女》
