前晚踏入子時正式步入羊年，市民爭相去黃大仙廟上頭炷香，平時紅事白事都到齊嘅黃夏蕙梗唔執輸。
有線電線新聞台噚日凌晨播映市民上頭炷香嘅情景，電視畫面突然出現夏蕙姨個樣，佢喺成千上萬善信當中都可以迫到排第一行頭位，一開始上香嗰陣，只見夏蕙姨突然面容扭曲，頭上戴嘅假髮移位，幾乎跌落嚟。好彩佢喺咁危急嘅關頭都眼明手快，即時將假髮㩒住再移正，然後不慌不忙咁繼續上香，當乜事都冇發生，薑果然係老嘅辣！
夏蕙姨噚日喺電話度唔認甩假髮，話：「我隻手辣到起水泡就真……我同周潤發家姐一齊去，一去就排第一，我求世界和平，唔好打仗，人人有工做囉，唔係為自己㗎。」
傳真︰2623-9278
電郵︰