政府成日話香港要發展高科技，又大講創意工業，八方最近同立法會議員陳智思傾開，先知香港再唔努力，分分鐘連夏威夷都比唔上。
Bernard（陳智思）父親係中總會長陳有慶，八方之前同大家報過料，陳有慶去年年尾一家大細，去夏威夷慶祝金婚。Bernard喺當地請咗個攝影師，拍低難忘片段。雖然夏威夷係度假勝地，呢位攝影師一啲都冇懶懶閒，影足成日，即晚十二點幾已經將成千張相燒錄成一張DVD，放喺一個錦盒內，封面重印上其中一張靚相。
不過跟住就麻煩，Bernard返到香港，攞住隻DVD問咗好多間曬相舖，竟然冇一間曬得出相，因為佢哋只能曬存喺VCD嘅數碼相，DVD就唔得。
傳真︰2623-9278
電郵︰