馬會果然有新氣象。八方聽聞，主席夏佳理請咗幾位工會領袖聽日（年初三）入場做羊年開鑼貴賓，佢哋包括陳婉嫻、陳國強同李鳳英。本來劉千石都在邀請之列，不過好似話大陸批准咗佢返廣州同阿媽度歲，所以佢只好臨時婉拒咗夏叔嘅美意，未能落實做頒獎嘉賓；另外馬會又請咗兩位局長葉澍堃、何志平入場。
呢幾位工會頭頭本身都係立會議員，有啲係夏叔嘅舊同事，新正頭，老友叫到冇計啦；但馬會主動請工會領袖做嘉賓，應該係破天荒，有乜微言大義，大家心照啦。是日第五場賀年盃，佢哋會出現頒獎台，第七場洋紫荊短途錦標賽，唔知會唔會叫佢哋頒埋獎。
李鳳英笑住話畀八方聽，今次係佢第一次入場，「咪去睇吓熱鬧囉。」夏叔自己有馬出，會否畀番幾場勁貼士呢班稀客，等佢哋冇機會做善事呢？
傳真︰2623-9278
電郵︰