英皇人氣組合Twins在馬年為公司勁賺三千萬，鍾欣桐和蔡卓妍亦榮升千萬小富婆，她們在羊年亦會繼續衝刺，所以Twins便騎着綿羊仔，自勉新一年繼續加油奮鬥，不過緋聞就不要太多了。
英皇人氣組合Twins在馬年勁賺三千多萬，榮登英皇藝人賺錢排行榜榜首，雖然蔡卓妍（阿Sa）和鍾欣桐（阿嬌）已躋身千萬小富婆之列，但現時香港經濟陷入困境，故日前她們騎着綿羊仔拍照時，二人也藉此勉勵港人說：「希望打工仔喺羊年搵銀連綿不絕，個個賺多啲。」
Twins在馬年由年頭忙到年尾，在羊年亦不會鬆懈，繼續加油衝刺，希望在事業再上一層樓，不過二人在羊年開工之前，則會分道揚鑣，各自去旅行。阿嬌說：「我六號會去加拿大做騷，之前可能會早啲走，同屋企人同埋表姐嘅朋友去啲近加拿大嘅地方行吓。」而阿Sa則說：「我喺新年會同啲同事去東南亞旅行，因為假期唔多，都唔可以走得太耐。」
談到新年願望，近期飽受余文樂及陳冠希緋聞困擾的阿嬌，想也不想就說：「希望好嘅嘢要埋嚟，衰嘅嘢走晒。因為緋聞好阻礙我嘅生活，好煩，阻住我出出入入，搞到一向鍾意去街嘅我都冇得去。」
阿嬌緋聞多多，未知她會否擔心令追求者卻步？她說：「唔知呀，平時我都冇乜嘢講，又唔會主動同人搭訕，同啲人啱講就講囉。」那阿嬌是否覺得與余文樂絕無發展機會？她說：「大家咁忙，係啲人成日寫，讀者咪以為真囉。」
去年大豐收，問阿嬌會否渴望買車買樓？她即笑說：「等我考咗車牌先啦，買樓都係供啫，冇乜所謂啦，喺經濟低迷嘅時候，我有份工做已經好好啦。」
阿Sa的新年願望則希望事事開心，她還略有感觸地說：「我希望自己同身邊嘅人開開心心，唔好發生咁多唔開心事，舊年籮記（羅文）同Gordon（英皇高層鄭堯強）離開我哋，令我有好大嘅感觸，經歷過呢兩件唔開心事之後，我覺得做人唔知聽日會有乜嘢事發生，所以有乜都應該趁早做。」
而Twins今年會準備利是派給工作人員，慰勞大家過去一年的辛勞，阿嬌笑言：「我哋一齊派利是好似兩公婆。」
採訪：朱芷瑩
攝影：陳慧安
場地及電單車提供：奧士車行
