贊助商嘉士伯今年為咗進一步搞好現場氣氛，今日喺球場入口安排專人免費幫球迷畫花面或者喺頭髮噴成四支球隊嘅國旗，而《蘋果》讀者當然又有着數，球迷只要攞住刊在AA8版嘅十蚊現金券，去大球場東西看台紀念品售賣處購買嘉士伯盃紀念精品滿一百元，即可作十元使用。
今年賀歲波嘅外隊戲碼比起過去幾屆好似差咗少少，亦都冇乜名牌球星，不過預售情況就比預期好，兩日夾埋已賣咗超過萬五飛，而今日學生同長者飛都所剩無幾，唔想買貴飛可以早啲去球場，而大球場朝早十點就開始賣飛。
嘉士伯盃賀歲波搞咗咁多年，喺國際球壇已經有一定地位，所以每年都會有唔少國家會直播或者轉播賽事，而今年當然唔會例外，據講泰國、丹麥、烏拉圭、伊朗、波蘭同中國等會直播或者錄播。