羊年行好運
恭喜恭喜，蘋果體育組恭祝各位讀者萬事如意；香港喺馬年雖然經歷風風雨雨，但相信各位都好似本地運動員咁，過完一關又一關；送馬迎羊，今日係羊年大年初一，幾位運動員都以自己有特色嘅揮春同祝福語向讀者拜年，希望大家都開開心心，羊年行好運。
《陳慧琪（左）、何智豪（滑浪風帆）（右）》兩位都是風帆運動員，當然希望比賽時一帆風順，特別係「阿豪」，佢喺羊年嘅目標更加係爭取奧運入場券。
《黃金寶（單車）》「阿寶」喺羊年希望參加嘅比賽好似單車輪咁唔會停，雙手亦都唔停捧盃，獲得二○○四雅典奧運入場券之餘，更達成多年心願，獲得職業車隊嘅青睞。
《胡兆康（保齡球）》羊年會考之後，「康仔」就會全身投入保齡球，以佢十八歲咁年輕、大賽經驗又豐富，未來一定大把前途。「康仔」希望大家都能「保齡」（保持青春）。
《趙詠賢（壁球）》釜山亞運金牌得主Rebecca獨得五十三萬獎金，成為亞運獎牌運動員最多獎金嘅富貴「壁」人，「小富婆」羊年當然唔會留手，喺亞洲賽希望再挫力高奪冠軍，同埋爭取更高世界排名。
《陳家麒（足球）》身為羊仔嘅「陳麒」，希望本命年順順利利，以好表現爭取重返港隊打東亞國家盃及亞洲盃；不過「陳麒」補充，就算自己唔入選香港隊，仍然全力支持香港打好每場仗。